EcoMedIslands

Il-gżejjer fil-Mediterran jiffaċċjaw sfidi persistenti fil-prevenzjoni u l-immaniġġjar tal-iskart minħabba l-iżolament ġeografiku tagħhom, l-infrastruttura limitata u l-varjazzjonijiet staġjonali kbar fil-popolazzjoni, b’mod partikolari dawk marbuta mat-turiżmu. Dawn il-fatturi jwasslu għal żieda fil-volum tal-iskart u joħolqu pressjoni akbar fuq is-sistemi lokali. Għaldaqstant, is-soluzzjonijiet ibbażati fuq l-ekonomija ċirkolari huma essenzjali biex tiġi żgurata s-sostenibbiltà fit-tul.

EcoMedIslands jindirizza din ir-realtà permezz ta’ mudell t’ekonomija ċirkulari li jgħaqqad il-prevenzjoni tal-iskart, it-titjib fil-prattiċi tal-immaniġġjar, u t-trasferiment ta’ soluzzjonijiet effettivi lil hinn miż-żoni involuti direttament fil-programm. Il-proġett jiffoka fuq it-tnaqqis tal-iskart, il-promozzjoni tal-kunċett tar-reuse, is-separazzjoni tal-iskart u t-titjib tar-riċiklaġġ. Sabiex jintlaħqu dawn l-għanijiet komuni u biex tiġi assigurata koerenza, l-azzjonijiet neċessarji għal-prevenzjoni u mmaniġjar tal-iskart ser jiġu implimentati b’mod ikkordinat.

EcoMedIslands
FONDI.eu

Il-proġett huwa mistenni jwassal għal riżultati konkreti, fosthom tnaqqis fil-ġenerazzjoni tal-iskart fiż-żoni pilota, proċessi aktar effiċjenti ta’ ġbir u trattament tal-iskart, u involviment akbar mill-partijiet interessati lokali. B’mod partikolari ser issir enfasi sabiex dawn is-soluzzjonijiet ittestjati jkunu jistgħu jiġu rreplikati fi gżejjer Mediterranji b’ karatteristiċi simili, sabiex jiġi żgurat impatt fit-tul lil hinn mit-terminu tal-proġett.

Riżultati Ewlenin

  • Strateġiji ta’ prevenzjoni tal-iskart imfassla apposta għal-kuntest ta’ gżejjer.
  • Titjib fil-proċessi tal-ġbir tal-iskart permezz ta’ sistema ta’ monitoraġġ real-time u għodda ta’ ottimizzazzjoni mħadmma mill-Intelliġenza Artifiċjali (is-sistema SMART-WASTE).
  • Pjattaforma diġitali li tiffaċilita l-iskambju tal-għarfien u tħeġġeġ l-involviment taċ-ċittadini.
  • Rakkomandazzjonijiet ta’ politika mfassla biex r-riżultati ikunu jistgħu jiġu adottati u rreplikati lil hinn mill-pajjiżi involuti direttament f’dan il-proġett.

Il-benefiċjarji tal-proġett jinkludu awtoritajiet lokali, operaturi tal-immaniġġjar tal-iskart, partijiet interessati relatati mat-turiżmu, u r-residenti. Il-viżitaturi se jibbenefikaw ukoll minn infrastruttura aħjar u servizzi mtejjba.

Peress li l-isfidi tal-iskart huma komuni fost il-gżejjer Mediterranji, il-kooperazzjoni lil hinn mill-fruntieri nazzjonali huwa essenzjali. Din il-kooperazzjoni bejn pajjiżi differenti se tiffaċilita l-iskambju tal-għarfien, il-mobilizzazzjoni ta’ msieħba assoċjati, u l-iżvilupp ta’ soluzzjonijiet li jistgħu jitkabbru u jiġu applikati f’kuntesti oħra. L-involviment ta’ kumpaniji tal-immaniġġjar tal-iskart u aġenti industrijali se jiżgura wkoll li l-għodod u l-istrateġiji żviluppati jiġu adottati b’mod effettiv.

EcoMedIslands għandu l-għan, li mal-medda taż-żmien jgħaqqad sistemi ta’ innovazzjoni diġitali u trasferiment tal-għarfien flimkien ma’ strateġija għal prevenzjoni tal-iskart immexxija mill-komunità sabiex jgħin lill-gżejjer Mediterranji jsiru mudelli ta’ sostenibbiltà u reżiljenza. Dan se jikkontribwixxi b’mod sinifikanti għall-għanijiet tal-UE dwar in-newtralità tal-klima u l-ekonomija ċirkulari, filwaqt li jiggarantixxi benefiċċji fit-tul għal kulħadd.