Il-proġett EcoMedIslands

Il-proġett EcoMedIslands

Il-proġett EcoMedIslands ġie mniedi uffiċjalment f’Għawdex fit-28 u d-29 ta’ Ottubru 2025, u ġabar flimkien 11-il imsieħeb minn seba’ pajjiżi bil-għan li jiġu żviluppati sistemi tal-immaniġġjar tal-iskart aktar intelliġenti, effiċjenti u sostenibbli madwar ir-reġjun.

Għal din il-laqgħa attendew ukoll numru ta’ stakeholders lokali, li ġew mistiedna jipparteċipaw fid-diskussjonijiet u jaqsmu r-realtajiet u l-isfidi ta’ Għawdex, sabiex flimkien jikkontribwixxu biex jiġu ffurmati l-azzjonijiet li dan il-proġett se jwettaq fil-futur.

X’Ifisser dan il-Proġett għal Għawdex

Għawdex intgħażel bħala żona pilota u se jintroduċi sistema innovattiva ta’ immaniġġjar tal-iskart taħt l-art. Il-proġett pilota ser jiġi introdott f’żona b’konċentrazzjoni għolja ta’ akkomodazzjonijiet short-let fejn jiġi ġġenerat ammont sinifikanti ta’ skart staġjonali.

Is-sistema, mgħammra b’sensuri tal-IoT li jimmonitorjaw il-livelli ta’ volum tal-iskart f’ħin reali, se tippermetti li jiġu ottimizzati l-iskedi tal-ġbir tal-iskart, u b’hekk jonqsu vjaġġi żejda u jitnaqqsu l-emissjonijiet.

Bl-appoġġ tal-Gozo Tourism Association, din l-inizjattiva għandha l-għan li tnaqqas l-eċċess ta’ skart, ittejjeb l-indafa ġenerali tal-post, u ssaħħaħ is-separazzjoni tal-materjal riċiklabbli.

Sforz komuni Mediterranju

Flimkien ma’ Għawdex, attivitajiet pilota se jiġu ttestjati wkoll fil-Greċja, il-Kroazja, l-Italja u Ċipru. Il-proġett se jkun mifrux fuq 45 xahar, u ser jiffoka sabiex janaliżża x-xejriet tal-ġenerazzjoni tal-iskart, l-ittestjar ta’ teknoloġiji innovattivi, u t-trasferiment ta’ soluzzjonijiet effettivi lejn gżejjer Mediterranji oħra.

.